RSS

በሀገራችን ከመቼውም ጊዜ በላይ የተረጋጋና አስተማማኝ ሰላም ሰፍኗል- ወያኔ ሕወሃት

29 May

 

ይኸነው አንተሁነኝ

ግንቦት 29 2013

ለአንዲት ሀገር ሕዝብ መሰረታዊ ሂዎት መስተካከልና በተረጋጋ ሁኔታ መቀጠል የሰላም መኖር አሌ የሚባል ጉዳይ አይደለም። ያሰቡትን ከውኖ እፎይ ለማለት፣ በሙያ በችሎታ ሰርቶ የልፋትን ዋጋ ያለ ምንም ችግር አግኝቶ ያማታ ማታ ያለስጋት ወደ ቤት ለመመለስ፣ በጥቅሉ ወጥቶ ሰርቶ በሰላም የስራን ዋጋ ለማግኘት ሰላም ወሳኝ ነገር ነው።

ነጋዴው የንግድ ስራውን ለማከናወን ህጋዊ በሆነ መንገድ የሚልከውን ልኮ የሚፈልገውን ለማስገባት ሰላም ያስፈልገዋል። ገበሬው ትነስም ትብዛ የያዛትን ማሳ አርሶና አለስልሶ ዘርቶና አዝምሮ ምርቱን ከጎተራው ለመክተት ሰላምን በእጅጉ ይፈልጋል። ሌላውም የትራንስፖርት አገልግሎት ሰጭው፣ የቢሮ ሰራተኛው፣ የእለት ተእለት የጉልበት አገልግሎት ሰጭው፣ መምህሩ፣ የሕክምና ሰራተኛው በሙሉ ስራቸውን ባግባቡ ለመከወን ሰላም ያስፈልጋቸዋል። ተማሪውና ተመራማሪው ጠበቃውና ዳኛው መልካም እይታ እንዲኖራቸውና ትክክለኛ ፍርድ ለመስጠት ሰላም ዋና ግብአታቸው ሊሆን ይገባል። ስለሆነም መልካም ነገር ለማግኘት ሰላም አስፈላጊ ስለመሆኑ በየትኛውም ወገን ክርክር ያለ አይመስለኝም። ነገር ግን ሕወሃት እንደሚያወራው የተረጋጋና አስተማማኝ ሰላም ለመኖሩ ማረጋገጫው ምንድን ነው? የመንገዶች መሰራት የህንጻዎች መገንባት ሕዝባችን በሰላም ስለመነሩ ማረጋገጫዎች ሊሆኑ ይቸላሉ? ዳኛዎች በፍርድ ወንበራቸው ስለተቀመጡ፣ መምህራን በትምህርት ቤቶች ኮሌጆችና ዩኒቨርሲቲዎች ማስተማሪያ መሳሪያቸውን ይዘው ስለታዩ፣ እንዲሁም ከስደት የተረፉት የህክምና ባለሙያዎች  በየሆስፒታሎች መገኘታቸው በእርግጥ ሰላም ስለመኖሩና በሰላም እየሰሩ ስለመሆኑ ምስክር ሊሆን ይችል ይሆን? ይህ የወያኔ “በሀገራችን የተረጋጋ ሰላም ሰፍኗል” ፐሮፓጋንዳ አንድ ነገር አስታወሰኝ፤ ባንድ ወቅት የሀገራችንና የውጭ የስነምድር ተመራመሪዎች ባንድ ላይ ኤርተሌ እየተባለ የሚተራውንና በአፋር ክልል የሚገኘውን የሚፈላ ቅልጥ አለትና አካባቢውን አይተው ከተመለሱ በሗላ የተናገሩት ነው ነገሩ።

ተመራማሪዎቹ በጥቅሉ ሲናገሩ “አካባቢው ከፍተኛ ሙቀት አለው። በዚህ አካባቢ ያለው የምድር ውስጥ እንቅስቃሴ የቆመ ወይም የሞተ አይደለም። አልፎ አልፎ ተመራማሪዎችና ጎብኝዎች በከፍተኛ ጥንቃቄና ጥበቃ አካባቢውን ሊጎበኙት ቢችሉም በቋሚነት ሂዎትን ባካባቢው ለመመስረት ግን አይቻልም። ምክንያቱም ለጊዜው ሰላም ያለው ቢመስልም በማንኛውም ሰአት የእሳተ ገሞራ ፍንዳታ ሊከሰትና አካባቢውን እንዳልነበረ ሊያደርገው ይችላልና ብለው ነበር።

በሀገራችንም ወያኔ ሕወሃት ልክ በሕዝባችን መካከል አመጽ የሚያፈነዳ ነገር እስካልተፈጠረ ድረስ (እንደ አፋሩ ኤርታሌ አንጻራዊ ጸጥታ እስካለ ድረስ) አደጋ የለም ሕዝባችንም በሰላም እየወጣ እየገባ ነው ባይ ነው። የሀገራችንን  ኢኮኖሚያዊ ፖለቲካዊና ማሕበረሰባዊ ነባራዊ ሁኔታ ስንመለከት  ደግሞ በሀገራችን አስተማማኝና የተረጋጋ ሰላም ሰፍኗል ለማለት የሚያስደፍሩ ነገሮች አይታዩም። እንዴውም እየታዩ ያሉ ምልክቶችና እየተደረጉ ያሉ ድርጊቶችን ስናስተውል ተቃራኒውን እንድናስብ እንገደዳለን። ለምሳሌ ያህልም፦

ሀገራችን እጅግ በጣም ሰፊ የሆነ ለእርሻ የሚሆን መሬት እንዳላት ቢታወቅም የሀገራችን ሰፊው አፈር ገፊ ገበሬ ግን በቂ የእርሻ መሬት እንዲያገኝ አልተፈቀደለትም። ይባስ ብሎ ለሱ የሚገባው መሬት ለአረብና ለሕንድ ነጋዴ እየተሰጠበት አዝኖ ነው ያለው። ስለሆነም አብዛኛው የሀገራችን ገበሬ ዛሬ መሬት የለውም፣ በሬ የለውም መኖሪያ እንኳ የሌለው ብዙ ነው። የበሬ ግንባር የምታክል ሽራፊ መሬት ያለው እንኳ ቢኖር እሷኑ ለማረስና አለስልሶ ለመዝራት ጊዜ አላገኘም፤ ልክ በፊውዳሉ ስርአት እንደሚሆነው የሚበዛውን ጊዜውን የካድሬ መሬት ለማረስ ነውና የሚያጠፋው። ይህ እንዴት ይሆናል? ለራሳችን መሬት ጊዜ ይኑረን? ብለው የጠየቁ አርሶ አደሮች በካድሬዎች ከይዞታቸው ተገፍተው በየከተማው ሎተሪ አዛሪና ለማኝ ሆነዋል። ይህን የሚያውቀው ሕወሃት ግን ያለው ችግር አመጽ ወልዶ ትርምስ እስካልተፈጠረ ድረስ በወያኔያዊ ቋንቋ የተረጋጋና አስተማማኝ ሰላም ነው እያለን ነው።

የንግዱን ማሕበረሰብ ስንመለከትም ካርሶ አደሩ የማይተናነስ ችግር ተሸክሞ በሀዘንና በቁጭት ነው እየኖረ ያለው። የስራ ግብር እንደማይከፍሉ ከሚነገርላቸውና የተለያዩ የውጭ ምርቶችን ያለቀረጥ ወደ ሀገር ውስጥ ከሚያስገቡት  የወያኔ ድርጅቶች ጋር  እንዲወዳደሩ ተፈርዶባቸው በመከራና በስቃይ ላይ ናቸው። ከዚህ በተጨማሪ ስራን ለማስፈጸም ከተለያዩ የሕወሃት ባለስልጣናት የሚጠየቁት እጅ መንሻና ያልተቋረጠው የወያኔ መዋጮ ወገባቸውን ሰብሮታል። ስራቸውን ለመቀጠልም ለማቆምም ተቸግረው ነው ያሉት። ቢሆንም ግን ሙሉ በሙሉ የንግድ ፈቃዳቸውን መልሰው ስራ እስካላቆሙና ችግራቸው አመጽ እስካልወለደ ድረስ በወያኔያዊ ቋንቋ ለንግዱ ማሕበረሰብ የሚሆን የተረጋጋና አስተማማኝ ሰላም ሰፍኗል።

በወያኔ የማሕበራዊ ተቋማት ተቀጥሮ የሚሰራውና የከተማ ኗሪው ባጠቃላይ በሀገራችን እየሆነ ያለው አላስደሰተውም። የኑሮ ውድነቱ ካቅሙ በላይ ሆኗል። በብሔር ብሔረሰቦችና በግለሰቦች መካከል የሚደረገው መድሎ ተስፋ አስቆርጦታል። ከዛሬ ነገ የተሻለ ነገር ይመጣል ብሎ ቢጠብቅም ምንም ማየት አልቻለም። የተወሰኑ የሕወሃት ባለስልጣናት ተቀያይረው ቢያይም ማሰቢያቸው ግን እንዳልተለወጠ ማስተዋል ችሏል፤ ምንም የታየ ለውጥ የለምና። ስለሆነም በሲቪል ሰራተኛውም ሆነ በከተሜው ላይ በችግር ላይ ችግር በምሬት ላይ ምሬት በስቃይ ላይ ስቃይ ጨመረ እንጅ ላፋታ እንኳ አላባራም። ይህም ቢሆን ግን አንድ ቦታ ላይ ፈንድቶ ላገዛዙ አስቸጋሪ ነገር እስካልተፈጠረ ድረስ ለወያኔ ሕወሃት የአስተማማኝና የተረጋጋ ሰላም ምልክት ነው።

በሁሉም የሀገራችን ክፍሎች በየትኛውም ቦታና የስራ መስክ በሚባል መልኩ ችግሩ ብሶቱ ከቋፍ ደርሶ ውጥረቱ አይሏል። የውጥረቱ መጠን ልክ በቤንዚን ባህር ላይ አንዲት ክብሪት ተጭራ ብትጨመር ሊፈጠር እንደሚችለው አደጋ አይነት ነው። ግን ይህ ውጥረት አልፈነዳም ልክ እንደ ኤርታሌ ውስጥ ለውስጥ ይታመሳል፣ ይብላላል ጊዜና ወቅት ይጠብቃል። ይሁን እንጅ ውጥረቱ ከትላንት ዛሬ ጨመረ እንጅ አልቀነሰም። ወያኔ ሕወሃት ግን ጭራችሁ ለኩሳችሁ ወይም አመጽ አስነስታችሁ አፈንድታችሁ እስካላየሁ ድረስ አስተማማኝና የተረጋጋ ሰላም አለ እያለን ይገኛል።

በእርግጥ ወያኔ ሕዝብ እያስተዳደርኩ ነው ብሎ የሚያስብ ቢሆን ኖሮ ችግሮች ከጫፍ ደርሰው ፈንድተው እስኪወጡ ባልጠበቀም ነበር። ምክንያቱም ፍንዳታ አካባቢ አይመርጥም፣ እሳት ወገን አይለይም፣ ገሞራ ዘመድ አይመርጥም ብሔርና ሃይማኖት አይለይም ቋንቋና ጾታ አይልም ሁሉንም አንዳመጣቱ ያጠፋል። ያገኘውን ነገር ሁሉ ባለው አቅም ያወድማል። የሕዝብ እምቢተኛነት በቃኝ አልገዛም ባይነት፣ በዚሁ የተነሳ የሚፈጠር የህዝብ አመጽም ልክ እንደ ገሞራ ነው ለጥፋቱ ቀመር የለውም። ለጉልበቱ የሚስተካከል ነገር አይገኝለትም። ባንድ ጊዜ በሁሉም ያሀገሪቱ ክፍሎች ሊከሰት የሚችል ከመሆኑ አንጻር ለመቆጣጠርም ካቅም በላይ ነው። ሊያደርስ የሚችለው ጥፋትም ከግምት በላይ ነው የሚሆነው። ለጊዜው ሕዝባችንን አብሮ መኖር፣ መቻቻል፣ መተሳሳብ ዝም ቢያደርገውም ምሬቱና ለወያኔ ያለው ጥላቻ ጠፋ ማለት አይደለም። ስለዚህም ወያኔ ሕወሃት በፈጠረው ችግር የተወለደው የምሬት ክብሪት የሕዝብን አልገዛም ባይነትና አመጽ ጭሮ ከመውለዱ በፊት ማን አለብኝ ብሎ እየገዛ ያለው ወያኔ ከውሸት እንቅልፉ መንቃት አለበት እንላልን።

 
Leave a comment

Posted by on May 29, 2013 in AMHARIC, ARTICLE

 

Tags: , , , , ,

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: